Ciwanan navê 11 taxên Geverê guhert

COLEMÊRG - Li Geverê koma duh heta derengiya şevê xwepêşandan li dar xistin, piştî çalakiyê belavok belav kirin û ragihandin ku wan navê 11 taxên Geverê guhertiye.

Ciwanên ku xwe bi navê “Hêzên Parastina Cewherî ya Gerverê” dan nasîn, heta derengiya şevê li ser şeqamên Geverê barîkat danîn û meş li dar xistin. Ciwan li ser hewldanên BDP’iyan jî belav nebûn. Piştre jî riya bejahî ya Gever-Wanê girtin.

Ciwan piştre çûn taxa Esentepe ku ciwanan navê wê kiriye Şehîd Bêrîtan, li wê derê de agir vêxistin û çalakiya xwe berdewam kirin. Ciwanan di çalakiyê de diruşmeyên “Bijî Serok Apo”, “PKK gel e, gel li vir e”, “Gelê Kurd li dijî zextan bêdeng namîne” qêriyan û belavok belav kirin.

TAXA ESENTEPE BÛ TAXA ŞEHÎD BÊRÎTAN

Ji beriya ciwan belavokan belav bikin daxuyaniyek dan û diyar kirin ku êdî wan Taxa Esentepe herêma Xweser û herêma Sor îlan kiriye. Her wiha ciwanan ragihand wan heta derengiya şevê li taxê nobet girtiye û nehêlaye leşker û polîs têkevin taxê.

Ciwanan diyar kir ku jibo li taxên din xweseriyê îlan bikin, dest bi xebatê kirine û gotin: “Me ji beriya niha navê taxa Esentepe kiriye Şehîd Bêrîtan û Xweserî lê îlan kiriye”.

NAVÊ TAXÊN DIN YÊN HATÎN GUHERTIN

Di daxuyaniyê de “Me ji wê rojê û şun ve nehêlaye polîs têkevin hindirê taxê. Em weke Hêzên Parastina Cewherî, ji niha û pêve, me van navan li taxên Geverê dikin: Taxa Yeşildere (Taxa Şehîd Eşref), Orman (Şehîd Egîd), Gungor (Şehîd Mazlum), Yeni Mahalle (Şehîd Jiyan), Cumhuryet (Çarçela) Dize (Şehîd Îslam), Îpek (Zerzan), Kaniheyder (Zap), Kişla (Baz). Em di demek kin de li van taxan Xweseriyê îlan bikin” hat gotin.



ANF NEWS AGENCY