Li Stenbolê 10 wesayît û marketek hat şewitandin

STENBOL - Bi mebesta protestokirina êrîşên nijadperest yên li hember Kurdan, li Okmeydani Însiyatîfa Ciwanên Apocî meşek pêk anîn, 10 wesayît û marketek dan ber molotofan.

Endamên Însiyatîfa Ciwanên Apocî li hember êrîşên nijadperest yên li Înegolê destpêkirî û li Dortyol û Erzirumê berdewam kirî li Okmeydana Stenbolê meşek li darxistin. Di kêliyên meşê de molotof hatin avêtin û rê li trafîkê hat girtin. Gurubê dirûşmên dilsoziya bi PKK’ê û Ocelan re avêtin. Piştî meşê 10 wesayît û marketek hat dayîna ber agir. Di marketê de zererek mezin pêk hat, wesayît jî ketin rewşa nayên karanîn.

Herwiha Însiyatîfa Ciwanên Apocî daxuyaniyek da û di daxuyaniyê de wiha tê gotin, “Dewleta Tirk û hikumeta wê polîtîkayek ya îmha û tûnekirinê li hember gelê Kurd û têkoşîna azadiyê di şopîne. Bi taybet îşkenceya li hember cenazeyên gerîllayan û lînca li hember gel hatî destpêkirin, wek pêngavek pêşî ya konsepta komkujiya wê di pêşerojê de bê pêkanîne. Însiyatîfê diyarkir wê li hember hemû êrîşan mafê xwe yê bersîvdanê bi karbînin”.



ANF NEWS AGENCY